«ՄԽԻԹԱՐ» մատենաշարի 44-րդ գիրքը`«Գերապայծառ Հայր Վարդան Եպիսկոպոս Աշգարեան (1937-2012)»
խորագրով
Մեսրոպ Հայունիի գրիչէն լոյսին ընծայուեցաւ «ՄԽԻԹԱՐ» մատենաշարի 44-րդ գիրքը`«Գերապայծառ
Հայր Վարդան Եպիսկոպոս Աշգարեան (1937-2012)» խորագրով, նուիրուած երջանկայիշատակ եպիսկոպոսի
կեանքին եւ գործունէութեան: Գիրքի հրապարակման թուարկութիւնն է 2013 տարին, վայրը` Այնճար: Ինչպէս
գիրքի յառաջաբանին մէջ կը նշուի, 176 էջերէ բաղկացած այս նկարազարդ հատորը հեղինակին
սիրոյ եւ յարգանքի տուրքն է “Վիեննական Մխիթարեանին եւ Հոգեւորականին”, զոր ան ճանչցած
է 1961 թուականէն ի վեր եւ որուն առաքելակիցը եղած է 1979-1983, Վիեննական Մխիթարեան
երկրորդական վարժարանին մէջ (Հազմիէ), հետագային անոր հետ մնալով սերտ գործակիցներ` հոգեւոր
ծառայութեան եւ կրթական ու գրահրատարակչական մարզերուն մէջ: Սոյն գիրքով Մեսրոպ
Հայունի ընթերցողին կը ներկայացնէ Հայր Վարդան եպս. Աշգարեանի կեանքն ու ստեղծագործական
ժառանգութիւնը եւ մատենագիտական զեկոյցներ` անոր հրատարակած գիրքերուն, ինչպէս նաեւ “Մուսա
Լեռ” ամսաթերթի եւ “Աւետիք” պաշտօնաթերթի մէջ հրապարակուած յօդուածներուն եւ գրութիւններուն
մասին: Ոգեկոչական գրութիւններուն մէջ ան վեր կը բերէ հայր Վարդանի մարդկային նկարագիրն
ու հոգեւորականի հանգանակը, այդ նպատակին ծառայեցնելով յատկանշական քաղուածքներ անոր
գրական եւ քարոզախօսական գործերէն: Գիրքին “Յաւելուած” վերնագրուած մասով, հրատարակուած
է ամենապատիւ տէր Ներսէս Պետրոս ԺԹ. կաթողիկոս պատրիարքին խօսքը` հայր Վարդան եպս. Աշգարեանի
վախճանումին առիթով, ինչպէս նաեւ հոգեւորական, մշակութային եւ հանրային մարզի ներկայացուցիչներու
վկայութիւնները անոր մասին` նոյն առիթով: Գիրքը կարելի է ձեռք բերել Հայ կաթողիկէ
պատրիարքարանէն կամ Այնճարի Հայ կաթողիկէ ժողովրդապետութենէն: